Ísland tapaði í kvöld 0-2 fyrir Frakklandi í ÞJóðadeildinni. Guðrún Arnardóttir varnarmaður Íslands var að vonum svekkt eftir leik.
„Svekkt með þessi tvö mörk sem við fengum á okkur. Mér fannst við kannski heilt yfir verjast ágætlega, þær voru ekki að opna okkur mikið og við hefðum kannski þurft að geta haldið betur í boltann. Í heildina kannski sanngjarn sigur hjá þeim en margt ágætt í okkar leik," sagði Guðrún.
Lestu um leikinn: Ísland 0 - 2 Frakkland
Ísland spilaði með vindinn í bakið í fyrri hálfleik og fékk nokkur góð tækifæri til að skora, en það tókst ekki. Seinni hálfleikurinn var svo erfiður á móti vindinum.
„Maður vill náttúrulega nýta vindinn þegar maður er með hann í bakið, það er alltaf erfiðara að komast fram völlinn þegar maður er í mótvindinum. Þannig eins og þú segir hefði verið "ógeðslega næs" að pota inn einu í fyrri hálfleik en það er bara svoleiðis," sagði Guðrún.
Ísland spilar við Serbíu áður en þær halda til Sviss á EM í byrjun júlí. ,,Ég er mjög spennt. Núna fer maður aðeins heim í félagsliðið að spila smá og svo komum við inn í það verkefni og komum saman. Ég held við getum tekið mikið úr þessum leikjum hjá okkur núna í þessum glugga. Varnarlega í dag vorum við flottar, en við kannski sofnum á verðinum þarna tvisvar og við þurfum að fínpússa það, vera skarpari í þeim hlutum."
Nánar er rætt við Guðrúnu í spilaranum hér fyrir ofan.
