Mattia Caldara, varnarmaður Milan á Ítalíu, er að ganga til liðs við Venezia á láni út tímabilið, en ítalskir fjölmiðlar greina frá þessu í kvöld.
Caldara er 27 ára gamall miðvörður sem er uppalinn hjá Atalanta en þroskaðist á lánstíma sínum hjá Cesena í B-deildinni.
Hann var keyptur til Juventus árið 2017 en spilaði þó aldrei leik fyrir félagið áður en Milan keypti hann ári síðar.
Caldara fékk ekki mikinn spiltíma hjá Milan á fyrstu leiktíðina og lék aðeins tvo leiki áður en hann gerði tveggja ára lánssamning við Atalanta.
Erfið meiðsli höfðu áhrif á spiltíma hans með Atalanta en hann er nú búinn að ná sér og mun nýta tækifærið með Venezia, sem vann sér sæti í Seríu A, á síðasta tímabili.
Hann verður á láni út tímabilið og fær Venezia forkaupsréttinn á honum.
Fimm Íslendingar eru á mála hjá Venezia. Óttar Magnús Karlsson, Bjarki Steinn Bjarkason, Arnór Sigurðsson, Jakob Franz Pálsson og Kristófer Jónsson eru allir á mála hjá Feneyjarliðinu.
Athugasemdir