Brasiíski miðjumaðurinn Casemiro telur að það hjálpi Real Madrid að Manchester City verði ekki með stuðningsmennina í stúkunni fyrir síðari leikinn í 16-liða úrslitum Meistaradeildar Evrópu.
Man City vann fyrri leikinn á Santiago Bernabeu 2-1 áður en kórónaveiran herjaði allan heiminn. Fótboltinn var settur í biðstöðu og klárast keppnin því í ágúst.
Seinni leikur liðanna fer fram á föstudag á Etihad en Casemiro telur að Real Madrid sé í kjörstöðu þar sem City verður án stuðningsmanna sinna í leiknum.
„Þetta verður allt annar leikur þegar stuðningsmenn eru ekki á vellinum," sagði Casemiro við Esporte Interactivo.
„Þetta verður mjög góður leikur og erfiður fyrir bæði lið en við erum Real Madrid og við vitum að við eigum möguleika á að fara áfram."
„Man City verður ekki með stuðningsmennina með sér og það gæti hjálpað okkur," sagði hann í lokin.
Athugasemdir