Harry Kane var sjóðandi heitur er England vann Búlgaríu 4-0 í undankeppni Evrópumótsins í kvöld en hann gerði þrennu og lagði upp eitt.

Enska liðið komst yfir á 24. mínútu en Raheem Sterling vann þá boltann við mark Búlgaríu og lagði hann út á Kane sem skoraði örugglega. Sterling virtist brjóta á varnarmanni Búlgaríu í aðdragandanum en ekkert dæmt.

Kane gerði annað markið á 49. mínútu en brotið var á Marcus Rashford innan teigs og vítaspyrna dæmd. Kane skoraði örugglega af punktinum og lagði svo upp mark fyrir Sterling sex mínútum síðar.

Kane fullkomnaði svo þrennu sína á 73. mínútu er brotið var á honum í teignum. Kane kominn með 25 mörk í 40 landsleikjum. Magnað afrek.

Lokatölur 4-0 fyrir Englendingum sem eru á toppnum í A-riðli með 9 stig, stigi meira en Kósóvó sem vann Tékkland fyrr í dag, 2-1.