Spánn: Benzema skoraði og lagði upp

Real Madrid lenti ekki í erfiðleikum er liðið mætti Espanyol í fyrsta leik dagsins í spænska boltanum.

Raphael Varane skoraði í fyrri hálfleik eftir sendingu frá Karim Benzema. Svo gerði Benzema út um leikinn með marki á 79. mínútu, eftir góðan undirbúning frá Federico Valverde.

Ferland Mendy fékk sitt seinna gula spjald á 83. mínútu og kláruðu heimamenn því leikinn manni færri.

Real er á toppi deildarinnar, með þriggja stiga forystu á Barcelona sem á leik til góða í kvöld. Gengi Espanyol á Santiago Bernabeu heldur áfram að vera skelfilegt, það eru meira en fimm ár liðin síðan liðið skoraði þar síðast.

Benzema er markahæstur í spænsku deildinni með 11 mörk og stoðsendingahæstur með 5.