Andri Fannar Baldursson var í byrjunarliði NEC Nijmegen í ótrúlegum bikarleik gegn sterku liði Feyenoord.
Leiknum var að ljúka rétt í þessu eftir vítaspyrnukeppni en Andri Fannar og félagar fóru ótrúlega vel af stað og leiddu með tveimur mörkum í hálfleik þrátt fyrir yfirburði heimamanna í Rotterdam.
Í síðari hálfleik var Andra Fannari skipt útaf og juku heimamenn sóknarþungan til muna. Þeir áttu 23 marktilraunir, með 12 sem rötuðu á rammann, sem er ótrúleg tölfræði fyrir 45 mínútur af fótbolta. Boltinn rataði þó ekki í netið fyrr en undir lok leiksins.
Philippe Sandler, varnarmaður Nijmegen, fékk að líta rauða spjaldið á lokamínútunum og var dæmd vítaspyrna semm Orkun Kokcu skoraði úr. Í uppbótartímanum jafnaði Igor Paixao svo metin fyrir heimamenn og náði að knýja framlengingu.
Framlengingin var hreint út sagt ótrúleg. Tíu leikmenn Nijmegen tóku forystuna en hún entist aðeins í tvær mínútur og staðan 3-3 í hálfleik framlengingarinnar.
Í síðari hálfleiknum gerðu heimamenn það sem þeir héldu að væri sigurmarkið á 117. mínútu en gestirnir tóku það ekki til greina.
Jordy Bruijn, sem kom inn af bekknum fyrir Andra Fannar og skoraði fimmta mark leiksins, jafnaði á 118. mínútu og var blásið til vítaspyrnukeppni.
Þar höfðu heimamenn í Feyenoord betur, 5-3.
Til gamans má geta að Feyenoord átti 50 marktilraunir í leiknum - með 27 sem rötuðu á rammann. Mattijs Branderhorst átti því stórleik í marki Nijmegen þrátt fyrir að hafa fengið fjögur mörk á sig.
Feyenoord 4 - 4 NEC Nijmegen
0-1 C. Verdonk ('33)
0-2 P. Marques ('45)
1-2 O. Kokcu ('90, víti)
2-2 I. Paixao ('92)
2-3 J. Bruijn ('96)
3-3 S. Gimenez ('98)
4-3 J. Dilrosun ('117)
4-4 J. Bruijn ('118)
5-3 í vítaspyrnukeppni
Arnór Sigurðsson, Arnór Ingvi Traustason og Ari Freyr Skúlason voru allir í byrjunarliði Norrköping í æfingaleik gegn Viborg í dag, með Andra Lucas Guðjohnsen á bekknum.
Norrköping tók forystuna í fyrri hálfleik en tapaði leiknum í þeim síðari þar sem niðurstaðan var 1-2 sigur Viborg.
Varberg tapaði þá æfingaleik gegn Tvaaker. Oskar Tor Sverrisson er á mála hjá Varberg.
Í kvennaboltanum hafði Örebro betur gegn Uppsala. Sólveig Jóhannesdóttir Larsen er leikmaður Örebro. Andrea Celeste Thorisson Diaz er á mála hjá Uppsala.
Norrköping 1 - 2 Viborg
Varberg 1 - 2 Tvaaker
Örebro 2 - 1 Uppsala
