Lestu um leikinn: Víkingur R. 3 -  1 Breiðablik

„Í raun og veru byrjum við leikinn fínt og mér fannst við spila fínt í fyrri hálfleik, það var jafnræði með liðunum, þau skiptust á að sækja og það voru fínar sóknir. Þeir fengu færi, við fengum færi, þetta var leikur," sagði Arnar eftir leikinn.

„Svo gerist bara eitthvað í seinni hálfleik sem ég veit ekki hvernig ég á að útskýra, Víkingar voru bara miklu grimmari og hlupu meira, börðust meira, og voru miklu líklegri fram að rauða spjaldinu. Svo gerist þetta rauða spjald og það breytir leiknum, þeir skora fljótlega í kjölfarið og þá verður þetta erfiðari. En mér fannst Víkingarnir miklu grimmari í seinni hálfleik, þeir vildu þetta meira og voru einfaldlega betri."

Arnar vill ekki skýra slakan seinni hálfleik sinna manna með þeirri staðreynd að Víkingur jafnaði metin rétt fyrir leikhlé.

„Það er aldrei góð tímasetning að fá á sig mark en hvað gerist í seinni hálfleik, ég hef enga skýringu á því, mér fannst við ekki mæta til leiks og Víkingar voru miklu grimmari og hreyfanlegri. Ég veit ekki hvort menn hafi haldið að þetta myndi koma að sjálfu sér, ég er svolítið orðlaus með seinni hálfleikinn."

„Ég hef ekki verið að tjá mig mikið um dómara eftir leiki og ég ætla ekki að fara að byrja á því hér. Það eina sem ég vona er að þetta hafi verið réttur dómur því það er blóðugt að fá seinna gula spjaldið ef þetta var ekki gult spjald, því það breytir leiknum að fá mann út af. En ef ekki þá breytum við því ekki úr þessu og þá er það náttúrulega bara djöfulli sárt, sama og Víkingar lenda í á móti Stjörnunni þegar þeir skora löglegt mark og fá kannski ekki vítaspyrnu. Þetta er blóðugt en þetta er partur af leiknum og við verðum að sætta okkur við það þó þetta sé erfitt," segir Arnar, sem viðurken

„Það er alveg hægt að segja það að ef þú ert kominn með gult áttu ekki að fara niður, en hann vill meina að hann hafi bara farið með aðra löppina og tekið boltann. Dómarinn segir að hann hafi farið með báðar lappir, ég verð bara að fá að sjá þetta aftur til að vega það og meta. En þegar menn eru komnir með gult spjald eiga þeir helst að standa í lappirnar, þú veist aldrei hvað menn gera ef þú ert að gefa mönnum tækifæri á að spjalda sig."

FH tapaði í kvöld gegn KR og Stjarnan tapaði gegn Þrótti, sem þýðir að Blikar hefðu getað endað leikinn tveimur stigum frá toppnum. Sama skapi eru þeir heppnir að vera ekki átta stigum frá toppnum eftir tapið. Hvort vegur þyngra?

„Blanda af báðum. Ég held að það sem við þurfum að einbeita okkur að núna er bara að hypja upp um okkur buxurnar og fara að spila alvöru fótbolta og hætta að hugsa um toppinn. Það eru fimm stig, það hefur sem betur fer ekki breyst, annars væri þetta game over, en ég held við eigum bara að einbeita okkur að næsta leik og fara að spila góðan fótbolta og hafa gaman að því að spila í þessari deild," segir Arnar.

Gamli reynsluboltinn Kári Ársælsson kom inn í vörnina í fyrsta skiptið í sumar þegar 20 mínútur voru eftir þrátt fyrir að hafa ekki verið á skýrslu fyrir leik!

„Hann var ekki á skýrslu og svo gerist það að Arnór Sveinn í raun og veru meiðist í upphitun. Þar af leiðandi dettur Kári inn, svo dettur Elli (Elfar Freyr) út og svo kemur rautt spjald. Svona er þetta stundum, menn þurfa alltaf að vera klárir, en auðvitað er þetta ekki ideal scenario fyrir þjálfara að lenda í. Það afsakar samt engan veginn frammistöðuna í seinni hálfleik," sagði Arnar.