Zoran Daníel Ljubicic, þjálfari Keflavíkur, segir að Gunnar Jarl Jónsson dómari hafi gert rétt í því að reka Magnús Þóri Matthíasson af velli í kvöld. Staðan var markalaus þegar Magnús Þórir hrinti varnarmanni Fram þegar boltinn var ekki í leik.
Rauða spjaldið breytti leiknum, Fram komst yfir strax eftir það og vann á endanum 2-1 sigur.
Rauða spjaldið breytti leiknum, Fram komst yfir strax eftir það og vann á endanum 2-1 sigur.
Lestu um leikinn: Keflavík 1 - 2 Fram
„Þetta er mjög svekkjandi. Það var eitt lið á vellinum þegar rauða spjaldið kom. Við klúðruðum mörgum dauðafærum. Svo gerðist þetta atvik sem ég er ósáttur með. Heimskulegt atvik og það var rétt hjá dómaranum að gefa honum rautt spjald," sagði Zoran.
„Eftir það var þetta mjög erfitt. Ég er mjög svekktur út í Magnús. Leikmaður á þessum aldri og hefur spilað þetta marga leiki á alls ekki að gera þetta."
Þetta var þriðja rauða spjaldið sem Keflavík fær á sig í deildinni í sex leikjum. Er spjaldasöfnun áhyggjuefni?
„Ég veit ekki hvað skal segja. Mér fannst við stundum fá of ódýr spjöld í kvöld. Ég veit ekki hvað er að gerast."
Keflavík er með fjögur stig, tveimur stigum frá fallsæti. „Deildin er orðin tvískipt. Við vorum að draga okkur neðar með þessu tapi í dag. Ég lagði þetta upp sem lykilleikmann upp á framhaldið. Menn voru að leggja sig fram en heimskulegt rautt spjald kostaði okkur þrjú stig í dag," sagði Zoran.
Viðtalið má sjá í heild sinni í sjónvarpinu hér að ofan.
