Alex Freyr Elísson hefur gert nýjan samning við Fram sem gildir út næsta tímabil. Þetta er tilkynnt á heimasíðu Fram.
Alex Freyr sem er 23 ára er uppalinn Framari og hefur spilað með félaginu allan sinn ferill. Sína fyrstu leiki með meistaraflokki lék hann árið 2015 og í heildina eru leikirnir orðnir 104.
„Alex Freyr er einn af fyrstu leikmönnum Fram til þess að koma upp í gegnum starfið í Grafarholtinu. Það er því vel við hæfi að samningurinn hafi verið undirritaður á framtíðarheimavelli okkar Framara í Úlfarsárdalnum í dag," segir í tilkynningu Fram.
Fram hafnaði í þriðja sæti Lengjudeildarinnar í sumar en liðið var markatölunni frá því að komast upp.
Athugasemdir