Championship: Brewster skoraði í ótrúlegu jafntefli

Ótrúlega fjörugri viðureign var að ljúka í Championship deildinni þar sem Hull City tók á móti Swansea í hörkuslag.

Heimamenn í Hull komust yfir snemma leiks með marki frá Leonardo Lopes en Wayne Routledge jafnaði fyrir Svanina og var staðan jöfn í hálfleik.

Marcus Maddison kom heimamönnum yfir í upphafi síðari hálfleiks en Kyle Naughton jafnaði skömmu síðar. Næst var það Mallik Wilks sem kom Hull yfir og aftur jöfnuðu gestirnir, í þetta sinn skoraði Jordan Garrick.

Gestirnir voru betri í opnum leik og voru vaðandi í marktækifærum. Rhian Brewster, sem er á láni frá Liverpool, gerði næsta mark Swansea á 84. mínútu eftir að hafa komið inn af bekknum 20 mínútum fyrr.

Þetta var þriðja mark Brewster í sjö leikjum hjá Swansea en hann kom til félagsins í janúar.

Brewster hélt hann hefði skorað sigurmarkið en svo reyndist ekki því Tom Eaves náði að pota inn jöfnunarmarki í uppbótartíma.

Swansea er fimm stigum frá umspilssæti eftir jafnteflið, átta stigum fyrir ofan Hull.