„Það er byrjunin sem fellir okkur. Við komum svolítið stressaðar inn í leikinn og gáfum þeim of mikið pláss á boltanum. Svo var pressan okkar ekki nógu góð, hún klikkaði," sagði Jakob Leó Bjarnason þjálfari.

Haukar byrjuðu deildartímabilið á tapi gegn Tindastóli og telur Jakob Leó stressið hafa spilað inní þar líka.

„Þetta er vissulega áhyggjuefni, það var svipað uppi á teningnum í fyrsta leik í deild. Þetta er eitthvað sem við þurfum að fara betur yfir og vinna bug á. Við áttum tíu góðar mínútur í dag og það voru síðustu mínúturnar í leiknum."

Liðin mætast aftur í Inkasso-deildinni á sunnudaginn og veit Jakob hvað þarf að laga fyrir þann leik.

„Við höfum spilað við Þrótt oft áður og við þekkjum þær vel. Það sem við þurfum að gera er að laga kollinn og mæta klárar í leikinn."