KR fór í fínt ferðalag norður til Akureyrar og flugu með eitt stig í pokanum suður eftir jafntefli gegn Þór/KA á SaltPay vellinum í Bestu deild kvenna.
Lestu um leikinn: Þór/KA 3 - 3 KR
„Stoltur af stiginu. Eins og við erum búnir að tala um í síðustu leikjum að við sjáum framfarir á liðinu og stig hérna eru framfarir þó við hefðum alltaf viljað þrjú þannig þetta er blanda af tilfinningum. Svekktur en ótrúlega stoltur af liðinu, við fögnum stiginu temmilega," sagði Arnar Páll Garðarsson annar þjálfara liðsins.
„Það er komin trú í liðið að við getum spilað fótbolta, spilað frá marki og getum pressað og við sýndum það í fyrri hálfleik, það er eitthvað sem við tökum úr þessum leik alveg klárlega."
KR átti frábæran fyrri hálfleik og var með 2-1 forystu þegar flautað var til leikhlés. Þór/KA komst hins vegar í forystu með tveimur mörkum á tíu mínútna kafla. Hvað gerist þar?
„Eðlilega kemur smá stress í okkur þegar 2-2 markið kemur og þær [Þór/KA] koma líka aðeins ofar á völlinn og pressa okkur, við hefðum getað leyst það aðeins betur. Við réttum þeim svolítið leikinn en frábær karakter að koma til baka. Það segir svolítið um liðið að þetta er leikur sem við hefðum tapað fyrir mánuði síðan," sagði Arnar.
Allt viðtalið má heyra í spilaranum hér að ofan.
