Rio Ferdinand, fyrrverandi leikmaður Manchester United, segir að eina sem hann getur gagnrýnt Jesse Lingard fyrir tíma sinn hjá United, er það að einbeiting hans fór oftar en ekki í eitthvað allt annað en fótbolta.
Lingard hefur verið í frábæru formi síðan hann gekk til liðs við West Ham í byrjun þessa árs og hefur hann unnið sér sæti í enska landsliðinu á ný.
Ferdinand segir að hann hafi alltaf verið mikill aðdáandi Lingard en hins vegar sé það eitt sem hafi pirrað hann.
„Ef ég tala sem sérfræðingur í sjónvarpinu, þá er ég líklega hans mesti aðdáandi," sagði Rio.
„Hann ólst upp hjá United á meðan ég var þar, svo ég hef fylgst með honum í gegnum tíðina."
„Eina sem ég get gagnrýnt hann fyrir á tíma sínum hjá United er það að oftar en ekki fór einbeiting hans á eitthvað allt annað en fótbolta. Hann hefur verið í vandræðum í einkalífinu en ég held að samskiptamiðlar hafi líka haft mikil áhrif á hann."
Rio hrósaði Lingard að lokum og sagði að skiptin hans til West Ham hafi fengið einbeitingu hans aftur í lag og nú sé hann að spila stórkostlega.
West Ham er í mikillri baráttu um sæti í Meistaradeild Evrópu að ári. Ef það tekst yrði það magnaður árangur hjá David Moyes, fyrrverandi stjóra Man Utd.
Athugasemdir