"Þegar þú klárar ekki fullt af færum færðu það í andlitið. Það gerðist í dag," sagði Dean Martin, þjálfari Selfyssinga, eftir 4-2 tap gegn Leikni í dag.
Lestu um leikinn: Selfoss 2 - 4 Leiknir R.
"Með boltann fannst mér þetta einn besti leikur sem við höfum spilað í sumar. Við sköpuðum fullt af góðum færum. Varnarlega vorum við líka fínir þangað til Leiknismenn jöfnuðu. Það var margt mjög jákvætt við leikinn en það er ekkert jákvætt við að tapa 4-2."
Liðið hefur nú tapað 4 leikjum í röð. Hvað er til ráða? "Ef ég vissi það væri ég milljónamæringur. Við þurfum að halda áfram. Við erum ungt lið og þurfum að læra af mistökunum. Við mætum bara á æfingu á morgun og byrjum að hugsa um næsta leik."
Þá reiknar Dean ekki með því að fá inn leikmenn í glugganum.
"Nei bara halda áfram að þróa þetta lið. Eins og staðan er núna bætum við engu við. Okkar markmið er að spila með eins marga Selfyssinga og hægt er. Ef við bætum aðkomumanni við er það á kostnað Selfyssings."
Þorsteinn Aron Antonsson var ekki með í dag en hann meiddist á EM U-19. Þá er lánssamningur hans við Selfyssinga útrunninn en líkur eru á að hann klári samt tímabilið með Selfossi. "Við vonum það. Hann kom meiddur úr landsliðsverkefni sem er ömurlegt, bæði fyrir okkur og hann."
Allt viðtalið má sjá í spilaranum hér að ofan.
