Spánn: 38 ára gerði sigurmarkið gegn Barca með klippu

Spánarmeistarar Barcelona hefja titilvörnina á tapleik gegn Athletic Bilbao. Hinn 38 ára gamli Aritz Aduriz gerði eina mark leiksins á 89. mínútu með glæsilegri klippu.

Aduriz hafði verið skipt inn á völlinn mínútu fyrr og kórónaði hann flottan leik heimamanna með þessu magnaða marki. Hann varð þar með annar leikmaðurinn í sögu spænska boltans til að skora 15 tímabil í röð, eftir Lionel Messi, sem var ekki með í dag vegna meiðsla.

Börsungar voru meira með boltann í leiknum en heimamenn vörðust vel og áttu furðulega auðvelt með að komast upp völlinn og skapa sér færi.

Hvorugu liði tókst þó að skora fyrr en Aduriz tryggði sínum mönnum dýrmætan sigur.

Luis Suarez fór meiddur af velli í fyrri hálfleik. Þetta eru vöðvameiðsli og ekki talin alvarleg en hann gæti þó misst af einhverjum vikum. Hann verður skoðaður betur um helgina.