FH vann magnaðan sigur á Breiðabliki á Kópavogsvelli í kvöld.

Breiðablik komst yfir þegar Davíð Ingvarsson kom boltanum í netið eftir sendingu frá Kristni Steindórssyni. Stuttu síðar jöfnuðu FH-ingar þegar Kristján Flóki Finnbogason kom boltanum í netið eftir sendingu frá Kjartani Kára Halldórssyni.

Veislan hélt áfram því Davíð bætti öðru marki sínu við og öðru marki Breiðablik aðeinis fjórum mínútum eftir að FH jafnaði metin.

FH-ingar voru í stuði í seinni hálfleik. Markaveislan byrjaði strax í upphafi seinni hálfleiks þegar Björn Daníel Sverrisson jafnaði metin. Bragi Karl Bjarkason kom inn á sem varamaður á 54. mínútu.

Mínútu síðar skoraði hann með sinni fyrstu snertingu eftir sendingu frá Böðvari Böðvarssyni. Hans fyrsta mark fyrir FH. Hann bætti síðan öðru marki við strax í kjölfarið.

FH-ingar voru ekki hættir því Sigurður Bjartur Hallsson bætti fimmta markinu við. Kristófer Ingi Kristinsson náði að klóra í bakkann fyrir Breiðablik undir lok leiksins. Heimamenn voru ekki hættir því Ásgeir Helgi Orrason minnkaði muninn enn frekar í blálokin.

Nær komst Breiðablik ekki og frábær sigur FH staðreynd. FH gerir sér lítið fyrir og stekkur upp í efri hlutann með þessum sigri. Liðið er í 6. sæti með 25 stig, jafn mörg stig og Fram sem er í 7. sæti. Breiðablik er í 3. sæti með 32 stig, fiimm stigum á eftir toppliði Vals sem tapaði gegn ÍBV fyrr í dag.