„Frábært að vinna Breiðholtsslaginn. Sýnum hverjir eiga Breiðholtið ennþá.“ sagði Vigfús Arnar Jósefsson þjálfari Leiknis eftir 1-0 sigur gegn ÍR í þriðju umferð Lengjudeildar karla.
Lestu um leikinn: Leiknir R. 1 - 0 ÍR
„Fyrri hálfleikurinn spilaðist soldið eins og við sáum hann fyrir okkur. Fengum góð færi í honum og náðum að gera nokkrum sinnum vel á boltanum og skorum flott mark.“
Leikurinn í dag var sá fyrsti sem er spilaður á grasinu í Breiðholti og leikurinn bar þess merki.
„Þetta er náttúrulega fyrsti leikurinn okkar á grasi og grasið er ekki alveg upp á sitt besta og það gekk ekki alveg nógu vel að tengja sendingar. En við stóðum varnarleikinn mjög vel og gerðum allt sem við þurftum til þess að ná í þessi þrjú stig.“
Leiknir eru nú loksins komnir með stig á töfluna eftir að hafa tapað fyrstu tveimur leikjunum. Það gerir því mikið fyrir þá að ná í sín fyrstu stig gegn nágrönnum sínum.
„Það þurfti lítið að mótivera strákana fyrir þennan leik. ÍRingar byrjuðu vel í mótinu og við vissum að þeir væru sprækir og við fórum vel yfir það.“
Viðtalið má sjá í heild sinni í spilaranum hér að ofan.
