„Í lok leiks eru kannski bæði lið ósátt við eitt stig," sagði Helgi Sigurðsson, þjálfari Fylkis, eftir jafntefli gegn FH fyrr í kvöld.
FH var betri aðilinn í fyrri hálfleik og leiddi 1-0 en heimamenn jöfnuðu snemma í galopnum síðari hálfleik þar sem liðin skiptust á að sækja endanna á milli.
„Við vorum að fá fullt af færum og hálffærum í seinni hálfleik. Með smá klókindaskap hefðum við getað klárað þennan leik."
Helgi var stoltur af sínum mönnum og telur sjálfstraust vera aðalatriðið bakvið góða frammistöðu gegn sterku liði eins og FH. Hann hefur mikla trú á leikmannahópi sínum og vill að Fylkismenn byrji að hugsa stórt.
„Við erum með frábært lið. Fylkir á ekki að sætta sig við annað en þrjú stig í hverjum einasta leik. Við þurfum að fara að hugsa þannig, hugsa stórt.
„Síðustu leikir hafa verið mjög góðir eftir þessar markasúpur sem við fengum á okkur gegn KA og KR. Ef strákarnir spila eins og þeir gerðu í dag og í síðustu leikjum þá fara þeir upp töfluna, það er engin spurning."
Athugasemdir
