Dagný fylgir í fótspor Paolo Di Canio

Dagný hefur leikið með númerið 32 á bakinu frá því hún gekk í raðir West Ham en framvegis verður hún númer tíu hjá liðinu. Katerina Svitková hefur borið þetta númer hjá West Ham síðustu árin en hún yfirgaf félagið í sumar.

Dagný hefur lengi verið númer tíu hjá íslenska landsliðinu.

„Ég á afmæli 10. ágúst, svo sú tala hefur alltaf verið mér hagstæð," segir Dagný en hún hefur ávallt verið mikill stuðningsmaður West Ham. Ein stærsta goðsögn í sögu félagsins var með þetta númer á bakinu á sínum tíma.

„Ég var framherji þegar ég var að alast upp og Paolo Di Canio var alltaf í uppáhaldi hjá mér. Hann var með númerið tíu hér hjá West Ham. Ég er líka með þetta númer hjá íslenska landsliðinu."

Enska úrvalsdeildin hefst eftir um þrjár vikur. West Ham á erfiðan leik í fyrstu umferð er þær heimsækja Englandsmeistara Chelsea.