England: Raul Jimenez stal stigunum í Leeds

Nýliðar Leeds United tóku á móti Wolves í síðasta leik helgarinnar í ensku úrvalsdeildinni.

Heimamenn í Leeds mættu orkumiklir til leiks og voru óheppnir að koma knettinum ekki í netið í fyrri hálfleik en staðan var markalaus þegar liðin gengu til búningsklefa.

Úlfarnir komu knettinum í netið snemma í síðari hálfleik en markið ekki dæmt gilt vegna rangstöðu eftir að hafa verið skoðað með VAR.

Leeds hélt áfram boltanum vel innan liðsins en átti erfitt með að brjótast í gegnum vörn Úlfanna. Það voru gestirnir sem komust yfir þegar Raul Jimenez átti skot fyrir utan teig. Boltinn breytti um stefnu af varnarmanni og kom Illan Meslier engum vörnum við.

Heimamenn leituðu eftir jöfnunarmarki en náðu ekki að koma knettinum á endastöð. Skipulagðir Úlfarnir héldu út og stálu mikilvægum stigum á Elland Road.

Wolves er með níu stig eftir fimm umferðir á meðan Leeds er með sjö stig.