„Búið að vera markmið frá því ég komst að því að ég væri ólétt"

Allir leikir úrslitaleikir
Er leikurinn á móti Wales úrslitaleikur?

„Á maður ekki að segja að allir leikir séu úrslitaleikir? Ef maður horfir á það þannig þá er þetta klárlega úrslitaleikur og við ætlum í þann leik til að ná í þrjú stig, þetta er okkar heimavöllur og hér ætlum við að bjóða öllum liðum upp á alvöru leik."

„Það samt þýðir ekki að við ætlum ekki að reyna líka við þrjú stigin í Þýskalandi. Þær þýsku eru búnar að vera svolítið vængbrotnar undanfarið, erfitt gengi og það er eitthvað sem við eigum að reyna nýta okkur og munum klárlega reyna að gera."

„Við byrjum á heimaleiknum gegn Wales á föstudag og svo tökum við stöðuna eftir það."

Fylgist vel með þýska liðinu
„Ég fylgist vel með þýska liðinu. Ég hef spilað með tveimur sem eru í landsliðshópnum og þekki þær ágætlega. Svo hef ég spilað í þýsku deildinni, þekki vel til leikmannanna og finnst gaman að fylgjast með þeim."

Verið markmiðið frá því Sandra varð ólétt
Sandra sneri fyrr á þessu ári til baka í landsliðið eftir tæplega tveggja og hálfs árs fjarveru.

Hún er í þessari viku að æfa aftur með landsliðinu á Laugardalsvelli í fyrsta sinn í um þrjú ár.

„Þetta er ótrúlega góð tilfinning og klárlega búið að vera markmið frá því ég komst að því að ég væri ólétt," sagði Sandra sem eignaðist dóttur árið 2021.

„Nú er undir mér komið að nýta tækifærið og reyna sýna og sanna að maður eigi heima í þessum hóp, ekki bara núna í þessu verkefni, heldur til lengri tíma."

„Þetta er alltaf jafn mikið þakklæti og alltaf jafn mikið stolt."

„Hópurinn er talsvert breyttur, nýir leikmenn að koma inn, en það þarf ekki að þýða að gæðin séu að minnka. Þetta eru leikmenn sem eru klárir í þetta verkefni og við treystum alveg 100%."

„Það er svolítið skrítið fyrir mig og okkur eldri að við séum allt í einu orðnar eldri leikmennirnir. Mér finnst bara rosalega góð stemning í hópnum og finnst allir leikmenn koma með sín gæði og koma með eitthvað að borðinu. Samblandan í hópnum er rosalega góð."

Komið fram við þær eins og hálfgerðar drottningar
Finnuru fyrir breytingum í kringum landsliðið?

„Það er alltaf jákvæð þróun, alltaf verið að reyna gera betur. Við erum eins og hálfgerðar drottningar, komið rosalega vel fram við okkur og passað að það sé allt eins gott og hægt er. Það er ekki hægt að kvarta neitt."

Klár ef kallið kemur
Geriru ráð fyrir að spila á föstudaginn?

„Ég vonast til þess, vonast alltaf til þess að spila. Ég er klár ef kallið kemur, en það liggur bara á Steina. Vonandi, mín vegna, að það verði," sagði Sandra.

Hún ræðir um tímabilið hjá Þór/KA og sína framtíð í viðtalinu sem má sjá í spilaranum efst.

Leikurinn á föstudag hefst klukkan 18:00 og fer fram á Laugardalsvelli. Smelltu hér til að kaupa miða.