Næstsíðasta umferð Pepsi Max-deildar karla fer öll fram klukkan 14:00 í dag. Á Meistaravöllum taka nýkrýndir Íslandsmeistarar KR á móti FH.

FH-ingar geta tryggt sér Evrópusæti með sigri í dag en ljóst er að KR mun ekki gefa þeim neina afslætti í dag. KR mun taka við bikarnum eftir leik í dag og vilja væntanlega sækja sigur í sínum síðasta heimaleik. Byrjunarliðin eru klár.

Rúnar Kristinsson, þjálfari KR, þekkir frasann „Þú breytir ekki sigurliði" og stillir upp sama liði og tryggði titilinn gegn Val í síðustu umferð.

FH-ingar gera þrjár breytingar á liði sínu eftir 6-4 sigur gegn ÍBV í síðustu umferð. Kristinn Steindórsson, Guðmann Þórisson og Þórður Þorsteinn Þórðarsson koma út og inn koma þeir Brandur Olsen, Guðmundur Kristjánsson og Cedric D'Ulvio. Liðin má sjá hér að neðan.