Reece James hjálpaði Gvardiol af velli á Etihad leikvanginum.
Josko Gvardiol varnarmaður Manchester City og króatíska landsliðsins þarf að fara í aðgerð eftir að hafa brotið bein í sköflungi í 1-1 jafntefli gegn Chelsea um helgina.
Gvardiol var skipt af velli snemma í síðari hálfleik vegna meiðslanna áður en hinn byrjunarliðsmiðvörðurinn Rúben Dias fór einnig meiddur útaf.
Man City endurkallar miðvörðinn Max Alleyne úr láni frá Watford til að hjálpa við að fylla í skörðin. Það er mikið af leikjum framundan hjá Man City í janúar.
Gvardiol fer í aðgerð síðar í vikunni og þá kemur í ljós hversu lengi hann verður frá keppni.
Gvardiol er 23 ára gamall og hefur spilað 120 leiki á tveimur og hálfu ári í Manchester. Hann á tvö og hálft ár eftir af samningi sínum við félagið.
John Stones er einnig að glíma við meiðsli og því er City að skoða kaup á Marc Guéhi, eftirsóttum fyrirliða Crystal Palace sem á aðeins hálft ár eftir af samningi.
Athugasemdir
