Tveir síðustu leikir 16-liða úrslita Afríkukeppninnar fara fram í dag þar sem Alsír og Fílabeinsströndin geta tryggt sér farmiða í 8-liða úrslitin.
Dagurinn byrjar á viðureign Alsír gegn Austur-Kongó sem er með öfluga leikmenn innanborðs.
Riyad Mahrez, Rayan Aït-Nouri, Ramy Bensebaini og Mohamed Amoura eru meðal leikmanna í hóp hjá Alsír en þeir munu spila gegn úrvalsdeildarleikmönnum á borð við Aaron Wan-Bissaka, Axel Tuanzebe og Noah Sadiki. Arthur Masuaku er fjarverandi vegna meiðsla.
Það má því búast við afar spennandi slag þegar Alsír mætir Austur-Kongó.
Stjörnum prýtt lið Fílabeinsstrandarinnar mætir til leiks seinna í dag gegn Búrkína Fasó. Fílabeinsströndin er ríkjandi meistari í Afríkukeppninni og verður skemmtilegt að fylgjast með Amad Diallo, Yan Diomande og Franck Kessié leika lystir sínar.
Dango Ouattara, Bertrand Traoré og Edmond Tapsoba eru meðal leikmanna í sterku liði Búrkína Fasó sem gæti skapað vandræði fyrir ríkjandi meistara.
Takist Alsíringum að vinna eiga þeir mjög erfiðan leik við Nígeríu framundan í 8-liða úrslitum.
Meistararnir frá Fílabeinsströndinni etja næst kappi við Mohamed Salah, Omar Marmoush og félaga í landsliði Egyptalands með sigri í dag.
Leikir dagsins
16:00 Alsír - Austur-Kongó
19:00 Fílabeinsströndin - Búrkína Fasó
Athugasemdir
