Sokratis er 32 ára gamall en hann hefur spilað með Arsenal síðustu þrjú ár.

Hann var ekki í Evrópu- og úrvalsdeildarhópnum hjá Arsenal fyrir þessa leiktíð. Leikmaðurinn komst að samkomulagi við enska félagið um að rifta samningnum á dögunum og er hann nú búinn að finna sér nýtt félag.

Sokratis gerði tveggja ára samning við Olympiakos í dag en þrettán ár eru síðan hann spilaði síðast í grísku úrvalsdeildinni. Þá lék hann með AEK en síðan þá hefur hann spilað með Genoa, Milan, Werder Bremen og Borussia Dortmund.

Íslenski landsliðsmarkvörðurinn Ögmundur Kristinsson er á mála hjá Olympiakos en hann kom til félagsins frá Larissa síðasta sumar.