Nonni var sáttur með þrjú stig á Þórsvelli.
„Frábært að vinna hérna - Þór erfitt lið, einn af erfiðustu útivöllum á landinu," sagði Jón Þórir Sveinsson, þjálfari Fram, eftir sigur á Þór í dag.
Lestu um leikinn: Þór 0 - 2 Fram
Fram skoraði fyrra mark leiksins snemma í fyrri hálfleik og seinna mark leiksins kom í seinni hálfleik. Liðið er ósigrað á útivelli í sumar.
„Mér finnst heilt yfir, alveg sama á hvaða velli við spilum, þá líður manni alltaf eins og við getum unnið leikinn. Við erum þannig lið og það er karakterinn og hugarfarið í liðinu. Það er enginn galdur á bakvið [þennan útivallarárangur]."
Vindurinn hafði áhrif á leikinn í dag. Þórsarar léku gegn vindi í seinni hálfleik en náðu að hemja boltann þokkalega án þess þó að valda gestunum miklum vandræðum.
„Mér fannst Þórsararnir leysa vindinn betur, settu mikla pressu á okkur og við þurftum að hafa fyrir því þó vindurinn væri í bakið á okkur. Þórsararnir urðu að sækja sigur og eðlilega komu þeir framar í seinni hálfleik."
Spjaldað fyrir „sáralítið og jafnvel minna en það"
Leikurinn var ekki mjög grófur en samt litu tíu gul spjöld og eitt rautt dagsins ljós.
„Dómarinn stóð sig vel í dag en fullmikið af spjöldum. Mér fannst spjöld fyrir sáralítið og jafnvel minna en það. Dómarinn hefði alveg getað komist upp með að spjalda minna í leiknum og það á við bæði lið."
Afskrifar ekki Grindavík og ÍBV
Framarar eru í hörkubaráttu við Keflavík og Leikni R. um tvö sæti í efstu deild að ári. ÍBV og Grindavík eru svo næstu lið fyrir neðan.
„Þetta verður vonandi fram á síðustu stundu og allir fá allt fyrir peninginn. Við ætlum að vera þarna og erum eitt af efstu þremur liðunum. Við afskrifum ekki Grindavík eða ÍBV í baráttunni. Það væri bara að skjóta sig í fótinn held ég."
Nonni var einnig spurður út í breytingar á liðinu fyrir leik, það sem hann var ánægðastur með í leik síns liðs og uppspil þegar hans lið tók markspyrnur gegn vindi í fyrri hálfleik. Nonni ræðir það í spilaranum hér að ofan þar sem viðtalið má sjá í heild sinni.
Athugasemdir
