Karólína Lea Vilhjálmsdóttir.
Reynir hér skot að marki í leiknum.
Sveindís fagnar markinu sínu í kvöld.
Sigrinum fagnað.
„Tilfinningarússíbaninn var í gangi í þessum leik," sagði Karólína Lea Vilhjálmsdóttir, leikmaður íslenska landsliðsins, eftir 2-1 dramatískan sigur gegn Serbíu í umspili Þjóðadeildarinnar í dag. Ísland hélt sér með sigrinum í A-deild Þjóðadeildarinnar og á þannig betri möguleika á að komast inn á næsta stórmót.
Lestu um leikinn: Ísland 2 - 1 Serbía
„Ég geri þessi mannlegu mistök. Ég vildi gera þetta smá spennandi í byrjun," sagði Karólína létt eftir leikinn. „Það var högg en mér fannst við komast vel inn í leikinn þá. Það vakti okkur aðeins. Ég tek það alveg á mig að hafa vakið þær aðeins. Eftir það fannst mér við vera með stjórn."
Eins og Karólína nefnir þá gerir hún erfið mistök snemma leiks sem verður til þess að Serbar taka forystuna.
„Þetta var náttúrulega högg. Ég get hlegið núna því við unnum leikinn. Ég vildi gera þetta aðeins spennandi. Þetta eru mannleg mistök. Það voru allir á bakinu á mér strax og reyndu að hressa mig við. Það þurfti smá endurstillingu og þá kom ég mér inn í leikinn. Ég er stolt af sjálfri mér að ná að halda haus. Ég sá ekki leikmanninn og þetta gerist."
„Ég dýrka allar þessar stelpur. Þetta eru bestu vinkonur mínar og ég get þakkað þeim í kvöld," sagði Karólína.
Gerir okkur klárlega að sterkara liði
Sveindís Jane Jónsdóttir er mætt aftur í landsliðið en hún tók leikinn yfir á síðasta stundarfjórðungnum ef svo má segja. Hún skoraði fyrra markið og lagði upp sigurmarkið með ótrúlegu hlaupi.
„Það er frekar næs að vera með þessa rakettu þarna frammi. Ég er ekki að segja að þetta hafi ekki verið góð sending en þetta þarf ekki að vera fullkominn bolti svo hún nái þessu. Það er rosalega gott að hún sé komin aftur eftir erfið meiðsli. Hún gerir okkur klárlega að sterkara liði. Þetta var algjör rússíbani en þegar Sveindís skoraði þá var ég viss um að við myndum taka þetta."
Sveindís er komin til baka eftir erfið meiðsli en hún - eða frekar uppleggið - fékk smá gagnrýni á samfélagsmiðlinum X (áður Twitter) og annars staðar eftir fyrri leikinn gegn Serbíu. Hún átti ekki alveg sinn besta dag þar og liðið ekki alveg að finna hana rétt, en hún steig heldur betur upp í dag og segir Karólína að hún geri liðið mun sterkara.
„Þetta er rosalegt vopn og ég er ekkert smá stolt af henni. Hún er búin að fá einhverja Twitter-kalla á sig en hún gerir okkur að mun sterkara liði og ég stend með því," sagði Karólína og brosti.
Við erum ekki hættar
Það var mikið fagnað í leikslok og mikið gaman en þetta er risastór sigur fyrir liðið. „Mér fannst svo sem alveg margir á leiknum og það var góð stemning. Ég er þakklát fyrir alla sem komu. Í Serbíu voru svona tíu á leiknum og maður var í æfingaleiksgír þá. Það var meiri stemning í dag og það var hrikalega gaman."
„Við erum ekki hættar," sagði Karólína og bætti við: „Það er okkar markmið (að komast á næsta stórmót) og við munum gera allt til að ná því."
Hægt er að sjá viðtalið við Karólínu í heild sinni í spilaranum hér fyrir ofan.
Hún gerir líka oft gæfumuninn.
— Max Koala (@Maggihodd) February 27, 2024
Förum líka að sparka hana í gegn í stað þess að senda beint á hana. https://t.co/ZbFAqiQ0cP
Ástæðan var upplegg liðsins og eins og í dag þegar við fórum að sparka hana í gegn frekar en að sparka á hana fóru hlutirnir að ganga betur.
— Max Koala (@Maggihodd) February 27, 2024
