Skagamaðurinn Arnór Smárason mun leika áfra með Lilleström í Noregi á komandi tímabili. Hann ætlar sér það þrátt fyrir að félagið hafi fallið úr norsku úrvalsdeildinni eftir umspil við Start seint á síðasta ári.
Arnór er að glíma í meiðsli og segist í samtali við mbl.is vonast til að vera kominn á ról í apríl. Hann segir það einnig mikið áfall að hafa fallið en liðið stefnir beint upp aftur. Liðið eigi heima í efstu deild.
„Staðan á mér er sú að ég er að jafna mig eftir vöðvarof og er búinn að vera í endurhæfingu sem mun halda áfram eitthvað fram á vorið. Ég spilaði mikið meiddur á síðasta tímabili og ætla að gefa þessu tíma núna og koma sterkur aftur inn. Ég vonast til að vera kominn á ról aftur í apríl ef allt gengur vel,“ sagði Arnór við mbl.is.
Samningur Arnórs við Lilleström rennur út eftir komandi tímabil og ætlar hann að taka stöðuna á sínum málum í sumar.
„Ég einbeiti mér að því að verða hundrað prósent heill, komast vel af stað aftur með liðinu og svo tek ég aftur stöðuna á mínum málum í sumar,“ sagði Arnór.
Athugasemdir