Sassuolo vann Udinese, 3-1, í fyrsta leik dagsins, en það voru mörg umdeild atvik í þeim leik.

Udinese átti tvö frábær færi í byrjun leiks áður en Sassuolo tók óvænta forystu er Armand Lauriente skoraði með laglegu innanfótarskoti úr teignum.

Fjórum mínútum síðar bætti Ismael Kone við öðru er hann mætti á ferðinni inn í teiginn, kom sér fram hjá varnarmanni og lagði boltann framhjá markverði Udinese og í netið.

Á 27. mínútu dæmdi dómari leiksins vítaspyrnu á Sassuolo er Nicolo Zaniolo var sparkaður niður, en tók vítaspyrnudóminn til baka eftir að hafa skoðað atvikið aftur á skjánum.

Undir lok fyrri hálfleiks dæmdi dómarinn aftur vítaspyrnu á Udinese er Oumar Soulet féll í grasið með tilþrifum. VAR-skoðun sýndi að það var lítil sem engin snerting og aftur var ákvörðunin dregin til baka.

Keinan Davis minnkaði muninn fyrir Udinese í þeim síðari er hann hirti frákast í teignum en Sassuolo svaraði því með þriðja markinu sem drap leikinn. Það gerði Edoardo Ianonni með skalla eftir fyrirgjöf frá vinstri.

Sassuolo er komið með 6 stig og situr í 12. sæti en Udinese í 10. sæti með 7 stig.

Artem Dovbyk og Matias Soule sáu til þess að Roma tæki öll stigin gegn Hellas Verona. Dovbyk skoraði á 7. mínútu með skalla og skoraði síðan Argentínumaðurinn Soule annað markið seint í síðari hálfleiknum.

Roma er komið upp í annað sæti með 12 stig en Verona í 16. sæti með 3 stig.

Pisa og Fiorentina gerðu markalaust jafntefli í Pisa.

Albert Guðmundsson byrjaði í liði Fiorentina en náði ekki að finna sig frekar en liðsfélagar hans í sóknarleiknum. David De Gea, markvörður Fiorentina, var maður leiksins með 7,7 í einkunn á FotMob en Albert aðeins með 5,9. Moise Kean sem spilar með Albert í sókninni var með 6,1.

Fiorentina hefur aðeins náð í þrjú stig í fimm leikjum á þessari leiktíð og situr í 15. sæti.

Roma 2 - 0 Verona
1-0 Artem Dovbyk ('7 )
2-0 Matias Soule ('79 )

Pisa 0 - 0 Fiorentina

Sassuolo 3 - 1 Udinese
1-0 Armand Lauriente ('8 )
2-0 Ismael Kone ('12 )
2-1 Keinan Davis ('55 )
3-1 Edoardo Iannoni ('81 )