„Þetta var gríðarlega flottur sigur," sagði Arnar Gunnlaugsson, þjálfari Víkings, eftir 1-0 sigur á Grindavík í kvöld.

Lestu um leikinn: Víkingur R. 1 -  0 Grindavík

Það var mikið undir í þessum leik; fallbaráttuslagur. Arnari var því létt að fara af vellinum með stigin þrjú, en leikurinn í kvöld fór fram við erfiðar aðstæður.

„Það hefur örugglega verið mjög kósý að sitja heima í stofu og horfa á leikinn. Þetta voru erfiðar aðstæður. Völlurinn var geggjaður, en það var rigning og rok."

„Við vorum mjög flottir í kvöld, agaðir og þolinmóðir. Við töluðum um það í hálfleik að það tæki kannski 90 mínútur að skora markið. Fyrri hálfleikur var gríðarlega flottur, en það vantaði að skapa meira í seinni hálfleik. Við fengum ferskar fætur inn þegar leið á hálfleikinn og við náðum sem betur fer að landa þessum gríðarlega mikilvægum sigri."

Víkingur fer upp í áttunda sæti með þessum sigri og er núna fjórum stigum frá fallsæti.

Að lokum sagði Arnar: „Ég var alveg að frjósa en sigurinn yljar mér um hjartarætur."

Tweet

Senda a Facebook Hafdu samband Senda frétt Prenta frétt Frétta leit