„Vonbrigði að hafa ekki náð allavega stigi úr þessum leik. Mér fannst við vera alveg með Frakkana í vasanum. Vorum að skapa okkur færi í fyrri hálfleik og vorum að verjast ótrúlega vel. Svekkjandi að fá þetta fyrsta mark á sig og svo kemur bara seinna markið í kjölfarið," sagði Cecilía Rán Rúnarsdóttir, markvörður Íslands, eftir 0-2 tap gegn Frakklandi í Þjóðadeildinni.
Lestu um leikinn: Ísland 0 - 2 Frakkland
„Mér fannst að við hefðum getað byrjað fyrr að nýta það að vera með vindi, við fórum svona að fatta það þegar það voru 20 mínútur eftir að við værum með vindinn og gætum pressað betur á þær og farið að skjóta á markið. Það vantaði svolítið í byrjun leiks."
Cecilía átti góðan leik og var annan leikinn í röð valin maður leiksins. Sérstaklega átti hún frábæra vörslu í fyrri hálfleik í stöðunni 0-0. Cecilía segir að henni hafi liðið ótrúlega vel í leiknum.
„Mér líður bara vel að spila fótbolta og er farin að spila í félagsliði og svona, það bara gefur mér sjálfstraust inn í landsliðið."
Nánar er rætt við Cecilíu í spilaranum hér fyrir ofan.
