Ferran Soriano, framkvæmdastjóri Manchester City, segir að Pep Guardiola gæti einn daginn þjálfað í Seríu A.
City Football Group, eigandi Manchester City, keypti ítalska félagið Palermo í dag og var það ellefta félagið sem er í eigu félagsins.
Soriano ræddi við Calciomercato í dag og talaði þar um Pep Guardiola, stjóra Man City, en hann segir að hann gæti einn daginn tekið að sér starf á Ítalíu.
Guardiola þekkir vel til þar en hann spilaði með Brescia og Roma frá 2001 til 2003.
Hann hefur þjálfað í þremur stærstu deildum Evrópu en á enn eftir að reyna fyrir sér á Ítalíu og í Frakklandi.
„Hann spurði mig hvort það væri mikil sól í Palermo. Hann mun kannski vinna hér einn daginn," sagði Soriano við Calciomercato.
„Hann veit hvernig við vinnum og þekkir ítalska boltann vel. Hann, eins og aðrir, er spenntur fyrir þessum samningi."
