England: Everton með sanngjarnan sigur á Arsenal

Everton lagði Arsenal að velli þegar liðin mættust í ensku úrvalsdeildinni í dag. Leikurinn fór fram á Goodison Park í Liverpool.

Fyrsta alvöru færi leiksins endaði með marki. Lucas Digne tók innkast sem olli usla í teignum. Dominic Calvert-Lewin átti skalla sem datt fyrir fætur Phil Jagielka sem kom boltanum í markið.

Michael Keane átti að spila leikinn en treysti sér ekki vegna veikinda. Því kom Jagielka inn og hann þakkaði fyrir sig.

🔵 | An unscheduled change to the starting XI sees Phil Jagielka replace the ill Michael Keane and James McCarthy take his place on the bench.

— Everton (@Everton) April 7, 2019

Staðan í hálfleik var 1-0. Arsenal-menn voru mjög slakir í fyrri hálfleiknum og var forystan verðskulduð. Unai Emery, stjóri Arsenal, gerði tvöfalda breytingu í hálfleik. Hann setti Aaron Ramsey og Pierre Emerick Aubameyang inn á fyrir Mohamed Elneny og Sead Kolasinac.

Arsenal náði ekki mikið að ógna í seinni hálfleiknum og fékk engin dauðafæri. Everton var heilt yfir betri aðilinn og átti sigurinn skilið að lokum. Lokatölur 1-0 fyrir Everton.

Samkvæmt tölfræði BBC þá átti Everton 22 marktilraunir á meðan Arsenal átti aðeins sjö.

Gylfi Þór Sigurðsson lék nánast allan leikinn fyrir Everton. Honum var skipt af velli þegar uppbótartíminn var að hefjast.

Everton fer upp í níunda sæti deildarinnar. Þessi sigur Everton hjálpar liðunum í kringum Arsenal; Tottenham, Chelsea og Manchester United. Baráttan um Meistaradeildarsæti er gríðarlega hörð. Arsenal er í fjórða sæti me'ð 63 stig, alveg eins og Chelsea. Man Utd er svo með 61 stig.