„Svekktur að tapa, töpuðum á móti öflugu KR liði í dag,“ sagði Magnús Már Einarsson, þjálfari Aftureldingar, eftir 2-1 tap á Meistaravöllum í kvöld.
Lestu um leikinn: KR 2 - 1 Afturelding
„KR-ingar herjuðu mikið á okkur og ég held það sé óhætt að segja að þeir hafi verðskuldað sigurinn miðað við færi og annað. Svekkjandi að komast yfir og ná ekki að fylgja því eftir, við fengum fínar stöður í fyrri hálfleik til að gera betur og fáum færi til að koma okkur í 2-0. Það vantaði upp á ákvarðanir, betri ákvarðanir þegar við vorum með opinn völl og svo að sama skapi þegar að KR kemst í 2-1 þá herjum við á þá, síðustu korter, tuttugu mínúturnar og á einhverjum degi hefði það dottið en það gerði það ekki í dag,“ hélt hann svo áfram.
Með sína rösku kantmenn þá ætti það að henta Aftureldingu vel að spila á móti hárri línu KR. Var það eitthvað sem hefði mátt nýta betur?
„Já klárlega, og það er kannski það sem ég er að tala um í fyrri hálfleik að við vorum að fá ákveðnar stöður til að sækja hratt á þá og það vantaði kannski betri ákvarðanir í sendingum. Bíða aðeins lengur og velja réttu sendinguna og tímasetja hlaupin í samræmi við það, í báðum hálfleikunum hefðum við geta gert það betur, klárlega.“
Eftir úrslit kvöldsins situr Afturelding í fallsæti, hefur Maggi einhverjar áhyggjur af stöðunni?
„Nei. Það er rosalega mikið eftir af þessu móti og við höfum lent í því áður í sumar að vera komnir fyrir neðan strik og svo breytist það mjög fljótt. Níu leikir eftir, hörkuleikir og mikil trú á því sem við erum að gera. Þetta eru allt hörkuleikir sem við erum búnir að vera í að undanförnu þó að þrír af þeim hafi vissulega tapast þá hafa þetta allt verið hörkuleikir.“
Viðtalið má sjá í heild sinni í spilaranum hér að ofan.
