Jóhannes Karl Guðjónsson var fyrr í kvöld tilkynntur sem nýr þjálfari FH og gerði hann fjögurra ára samning við félagið. Hann lét af störfum hjá AB í Danmörku á dögunum vegna fjölskylduástæðna. Ráðningin hefur verið í pípunum í þónokkurn tíma, en fyrst greint var frá tíðindunum í byrjun október.
Jói Kalli var tilkynntur í kvöld ásamt aðstoðarþjálfaranum Árna Frey Guðnasyni. Félagið tilkynnti jafnframt nýja stefnu til félagsins til fjögurra ára, þar sem yngri leikmenn og skemmtilegri fótbolti voru í forgrunni.
Fótbolti.net ræddi við Jóa Kalla í Kaplakrika fyrr í kvöld.
„Eftir spennandi viðræður við FH kom fram að við vorum með svipaða sýn á hlutina. Eftir að það kom í ljós að ég ætlaði ekki að vera lengur úti í Danmörku vorum við klár í þetta samstarf. Það var frábær niðurstaða og ég stend hérna sem mjög stoltur þjálfari FH.“
Hvers vegna leitaði hugurinn heim?
„Af fjölskylduástæðum. Fjölskyldan var með mér úti í eitt ár og var flutt heim. Mig langaði ekki að vera lengur einn úti, ég kom heim vegna fjölskyldunnar og þar af leiðandi endaði ég hér í FH í mjög spennandi verkefni.
Var erfitt að skilja við AB?
„Já, þetta var tími sem maður var búinn að vinna að fyrir félagið og ég hafði náð tengslum við leikmenn og annað. Maður var búinn að ganga í gegnum erfiða tíma líka en maður komst í gegnum þá. Þetta var farið að ganga ansi vel og við vorum á toppi deildarinnar. Það er alveg eftirsjá í því verkefni. En fyrir framan mig er núna mjög spennandi verkefni og spennandi tímar sem er það sem mig langar að gera.
Koma FH aftur í fremstu röð
„Þetta eru mjög spennandi tímar. Þetta er fyrsta sinn sem ég er ráðinn þjálfari til að framfylgja ákveðinni stefnu. Þegar við ræddum fyrst saman þá endurspeglar þessi stefna hvað ég stend fyrir sem þjálfari. Ég er mjög spenntur fyrir komandi tímum hjá þessu sögulega félagi. Markmiðið er það að statt og stöðugt að reyna bæta sig og koma FH á sem skemmstum tíma í fremstu röð. Á sama tíma snýst þetta um að spila þennan leikstíl sem við höfum talað um: Orkumikinn fótbolta og gefa ungum leikmönnum tækifæri.“
Viðtalið má sjá í heild sinni hér að ofan.
