Lengjudeildin: Jafnt í fallbaráttuslagnum á Grenivík

Magni og Þróttur R. mættust í fallbaráttuslag í Lengjudeild karla og var staðan markalaus eftir bragðdaufan fyrri hálfleik.

Það gerðist lítið marktækt fyrr en gestirnir úr Laugardalnum tóku forystuna á 66. mínútu. Oliver Heiðarsson skoraði þá eftir glæsilegt einstaklingsframtak þar sem hann stakk vörn Magna af eftir langa sendingu upp hægri vænginn og kláraði með föstu skoti í fjærhornið.

Grenvíkingar svöruðu fyrir sig sjö mínútum síðar þegar Kairo Edwards-John skoraði laglegt mark eftir góða stoðsendingu frá Costelus Lautaru.

Bæði lið komust í færi til að stela sigrinum en inn fór boltinn ekki og niðurstaðan 1-1 jafntefli.

Magni er áfram í botnsætinu, með 9 stig eftir 15 umferðir. Þróttur er tveimur sætum fyrir ofan með þremur stigum meira.

Það tekur tíma fyrir stöðutöfluna að uppfærast.