Cesc: Fann í COVID að ég vildi verða þjálfari

Como eru nýliðar í efstu deild og hafa verið að spila góðan bolta undir stjórn Fabregas, sem lagði skóna á hilluna í fyrra eftir að hafa áttað sig á því í COVID faraldrinum að hann vildi verða þjálfari.

„Þegar ég var 32 ára gamall skall COVID á og Ligue 1 var stöðvuð í fimm mánuði. Ég sat heima og lærði fyrir B-þjálfararéttindin hjá UEFA," sagði Fabregas.

„Á þessum tíma talaði ég við mikið af þjálfurum um allskonar málefni. Ég talaði við sérfræðinga í tölfræði og öðru og ég fann að ég hafði ekki lengur sama hungur og áður sem leikmaður. Ég fann að ég var kominn með hungur í að læra meira um leikinn og ákvað að fara yfir í þjálfun."

Það tók Fabregas mjög stuttan tíma að koma sér í þjálfarastarf, en hann fór upprunalega til Como sem leikmaður og keypti lítinn hlut í félaginu áður en hann var ráðinn sem aðstoðarþjálfari og síðar sem aðalþjálfari.