Championship: Lærisveinar Lampard töpuðu stigum

Lærisveinar Frank Lampard í Coventry City töpuðu mikilvægum stigum í umspilsbaráttunni er liðið gerði 1-1 jafntefli við fallbaráttulið Hull City á MKM-vellinum í Hull í kvöld.

Coventry var mun betri aðilinn í kvöld og fékk liðið urmul af færum til þess að gera út um leikinn.

Matt Grimes kom Coventry yfir á 46. mínútu leiksins, en hann mun þó líklega ekki fá markið skráð á sig þar sem boltinn hafði síðast viðkomu af Charlie Hughes, leikmanni Hull.

Haji Wright, framherji Coventry, hefði með smá heppni getað skorað þrennu í leiknum, en Ivor Pandur var frábær í marki heimamanna, varði tvö og síðan kom stöngin honum til bjargar í eitt skiptið.

Frammistaða Pandur gaf liðsfélögum hans von um að koma til baka og rættist það er Abu Kamara jafnaði átta mínútum fyrir lok venjulegs leiktíma.

Svekkjandi úrslit fyrir Coventry sem hefur að vísu litið mjög vel út síðan Lampard tók við. Það situr í 6. sæti með 63 stig, sem er síðasta sætið sem gefur þáttökurétt í umspilið, en Hull í 20. sæti, þremur stigum fyrir ofan fallsæti þegar fjórar umferðir eru eftir af deildinni.