Roque hefur aðeins eytt hálfu ári hjá Börsungum en hann kom til félagsins frá Athletico Paranaense.

Framherjinn fékk fá tækifæri undir stjórn Xavi og er þá ekki í plönum Hansi Flick.

Roque hefur reynt að hafa áhrif á liðsvali þjálfarans á æfingum til þess að brjóta sér leið inn í liðið, en Deco, yfirmaður fótboltamála hjá Barcelona, mætti á æfingasvæðið og bannaði honum að ræða við Flick um þessi mál.

Var honum einnig tjáð að hinn ungi og efnilegi Pau Victor væri á undan honum í goggunarröðinni og því mætti hann leita að sér að nýju félagi.

Portúgalska félagið Sporting Lisbon hefur mikinn áhuga á Roque og eru viðræður hafnar á milli Barcelona og portúgalska félagsins.

Barcelona hefur greinilega ekki fyrirgefið honum og umboðsmanni hans fyrir hegðun þeirra eftir tímabilið, en þeir létu gamminn geisa í viðtölum við spænsku pressuna. Þar gagnrýndu þeir Xavi og stjórnarmenn félagsins við að standa ekki við gefin loforð.

Roque, sem er 19 ára, vildi ólmur sanna sig hjá Barcelona í sumar, en sá möguleiki er ekki lengur í myndinni.