Stjarnan mætti Kára í Akraneshöllinni í kvöld en leiknum lauk með 1-1 jafntefli eftir 90 mínútur og staðan var ennþá jöfn, 2-2, að framlengingu lokinni.
Þá þurfti að grípa til vítaspyrnukeppni þar sem Bestu-deildar lið Stjörnunnar hafði betur gegn nýliðunum í 2. deild, þar sem Árni Snær Ólafsson varði tvær af þremur spyrnum Káramanna á meðan að Garðbæingar skoruðu úr öllum sínum spyrnum og Stjarnan því í pottinum þegar dregið verður í 16-liða úrslit á föstudaginn næstkomandi.
Fótbolti.net ræddi við Jökul Elísabetarson, þjálfara Stjörnunnar, að leik loknum, en Jökull var að vonum ánægður með að komast áfram í Mjólkurbikarnum.
Lestu um leikinn: Kári 3 - 6 Stjarnan
Hvernig fannst Jökli leikurinn spilast?
„Mér fannst þetta bara frábær leikur, skemmtilegur leikur. Við vissum alveg að þetta yrði erfitt. Virkilega gott lið, við skoðuðum þá vel og sérstaklega leikinn á móti Fylki. Það var langbesti leikurinn þeirra. Þetta er vel spilandi lið, hugrakkt og djarft lið og mikið power í þeim. Við vissum alveg að myndum lenda í einhverjum vandræðum en var að vona að myndum ekki fara í framlengingu.“
Stjarnan komst ítrekað í góðar stöður og góð færi í leiknum en náðu ekki að gera sér mat úr því. Hvað olli því?
„Mér fannst við nú komast í meira en bara stöður, við eigum hérna sittera fyrir framan markið og það er alls konar sem veldur. Þeir ná að krafsa og henda sér fyrir það og í einhverjum tilfellum gerum við ekki nógu vel til að klára það. Það er bara eins og gengur, ég var allan tímann að hugsa og sagði við strákana, njótum þess að vera í geggjuðum leik. Líka í framlengingu og inn í vító.“
Káramenn spiluðu mjög vel í dag, pressuðu Stjörnuna stýft, sérstaklega fyrstu mínúturnar í leiknum. Var eitthvað í leik Kára sem kom Jökli á óvart?
„Nei ekki neitt, þeir eru vel spilandi, hreyfanlegir, með vel spilandi markmann og þeir geta spilað sig í gegnum nokkuð góðar pressur, þannig nei það var ekkert sem kom á óvart. Ég átti aldrei von á stórum sigri hérna í dag, fjarri því.“
Einnig var rætt um pressu Kára, á hvaða getustigi Kári gæti spilað og frammistöðu Árna Snæs í marki Stjörnunnar, en viðtalið í heild sinni má sjá í spilaranum hér að ofan.
