Leverkusen borgar 32 milljónir evra fyrir Demirbay sem verður 26 ára í sumar og á tvo A-landsleiki að baki fyrir Þýskaland. Demirbay er af tyrkneskum ættum og á tólf leiki að baki fyrir yngri landslið Tyrklands.

Demirbay hefur verið hjá Hoffenheim síðan 2016 en áður var hann leikmaður Hamburger. Þar vann hann sér það til frægðar að tala niður til kvenkyns dómara í þýsku B-deildinni.

Hann sagði dómaranum að fara aftur í eldhúsið þar sem hún ætti heima. Dómarinn stöðvaði leikinn og rak Demirbay útaf. Hann fékk fimm leikja bann og þurfti að dæma unglingaleik hjá stelpum í refsingarskyni.

Demirbay afsakaði sig á samfélagsmiðlum en vakti ekki mikla hrifningu þegar hann mætti á unglingaleikinn. Í stað þess að mæta í íþróttagalla var hann klæddur upp í merkjavörum, þröngum gallabuxum, háum skóm, frakka og með trefil.

Hann dæmdi þó leikinn og samdi vel við stúlkurnar.