Ítalía: Meistararnir töpuðu stigum í fyrsta leik - Albert ekki með Fiorentina

Genoa missti á dögunum einn af bestu mönnum síðustu leiktíðar, íslenska landsliðsmanninn Albert Guðmundsson, en það kom ekki að sök.

Alessandro Vogliacco kom Genoa yfir á 20. mínútu eftir klaufaleg mistök Yann Sommer í markinu.

Heimamenn fengu aukaspyrnu sem var stýrt inn í teiginn og var boltanum stangað í átt að marki. Sommer virtist halda að boltinn væri á leið yfir, en hann hafnaði í slá, datt út á Vogliacco sem potaði honum í netið.

Tíu mínútum síðar jafnaði Marcus Thuram metin fyrir gestina og kom hann síðan Inter í forystu þegar fimm mínútur voru eftir af venjulegum leiktíma.

Tíminn var að fjara út fyrir Genoa að ná í stig en vonin var ekki alveg úti því seint í uppbótartíma fengu heimamenn vítaspyrnu er Yan Bisseck handlék boltann.

Junior Messias fór á punktinn en Sommer sá við honum. Sem betur fer fyrir Messias datt boltinn aftur út í teiginn og sá hann til þess að koma boltanum í netið. Lokatölur 2-2.

Nágrannar Inter í Milan gerðu 2-2 jafntefli við Torino. Gestirnir í Torino komust yfir á sjálfsmarki Malick Thiaw eftir hálftímaleik og bætti Duvan Zapata við öðru áður en hálfleikurinn var úti.

Milan svaraði í síðari hálfleik. Alvaro Morata skoraði fyrsta mark sitt fyrir félagið á 89. mínútu og jafnaði Noah Okafor áður en flautað var til leiksloka.

Empoli gerði markalaust jafntefli við Monza og þá gerði Fiorentina 1-1 jafntefli við Parma. Albert Guðmundsson skrifaði undir hjá Fiorentina í gær, en hann var ekki í leikmannahópi Flórensarliðsins í dag.

Empoli 0 - 0 Monza

Genoa 2 - 2 Inter
1-0 Alessandro Vogliacco ('20 )
1-1 Marcus Thuram ('30 )
1-2 Marcus Thuram ('85 )
2-2 Junior Messias ('90 )
2-2 Junior Messias ('90 , Misnotað víti)

Milan 2 - 2 Torino
0-1 Malick Thiaw ('30 , sjálfsmark)
0-2 Duvan Zapata ('68 )
1-2 Alvaro Morata ('89 )
2-2 Noah Okafor ('90 )

Parma 1 - 1 Fiorentina
1-0 Dennis Man ('22 )
1-1 Cristiano Biraghi ('75 )
Rautt spjald: Marin Pongracic, Fiorentina ('83)