Ítalía: Belginn stóri með sigurmark toppliðsins

Það var boðið upp á mikla skemmtun í Bergamó í kvöld þegar Atalanta tók á móti toppliði Napoli í toppbaráttuslag. Napoli vann á endanum 3-2 útisigur.

Ítalski landsliðsmaðurinn Mateo Retegui kom Atalanta yfir með þrumuskoti en Matteo Politano jafnaði með svipuðu marki.

Skotinn Scott McTominay kom Napoli svo yfir eftir sendingu Zambo Anguissa og staðan 1-2 í hálfleik. Ademola Lookman sýndi einstaklingstöfra þegar hann jafnaði þegar tíu mínútur voru liðnar af seinni hálfleik.

Á 78. mínútu skoraði Belginn Romelu Lukaku frábært skallamark eftir góða fyrirgjöf Anguissa og kom toppliðinu aftur yfir. Áttunda deildarmark Lukaku á tímabilinu og það reyndist sigurmarkið.

Öflugur 3-2 sigur Napoli sem er með sex stiga forystu í ítölsku A-deildinni og vann sinn sjötta sigur í röð. Inter, sem er í öðru sæti, á hinsvegar tvo leiki til góða. Inter tekur á móti Empoli annað kvöld. Atalanta er stigi á eftir Inter.