Eftir leiðinlegan leik í fyrstu umferð gegn HK þar sem markalaust jafntefli var niðurstaðan, þá hefur KA unnið leiki gegn KR, Leikni og Keflavík sannfærandi.

Mikael Nikulásson, fyrrum þjálfari Njarðvíkur, telur að KA geti orðið Íslandsmeistari. Ásgeir Sigurgeirsson og Hallgrímur Mar Steingrímsson eru í fantaformi.

„Það er bara þannig að KA getur unnið þetta mót, ég hef séð það í fyrstu fjórum umferðunum," sagði Mikael í hlaðvarpsþættinum The Mike Show.

Guðjón Þórðarson, sem gerði KA að Íslandsmeisturunum 1989, er hrifinn af því sem hann hefur séð hingað til.

„KA er miklu betur undirbúnir, þeir eru í miklu betra formi andlega og líkamlega, og Addi er með mikið meira jafnvægi á liðinu en í fyrra. Þessir jafnteflisleikir í fyrra byggðu ákveðinn grunn fyrir þetta tímabil. Svo þegar mennirnir komast í form, eins og Hallgrímur Mar - það er allt annað að sjá hann hvernig hann ber sig á fótboltavellinum - þessi ógn, liðin finna fyrir þessu. Þessir stráka þekkja hvorn annan og vita takmörkin sín. Þetta er ekki rosalega flott eitthvað, þetta er mjög einfalt, yfirvegað og árangursríkt," sagði Guðjón.

KA hefur náð þessum árangri þrátt fyrir að vera með langan meiðslalista. Næsti leikur liðsins er toppbaráttuslagur gegn Víkingi á föstudagskvöld.