Íslendingar komu við sögu í leikjum dagsins víða um Evrópu og var Rúnar Þór Sigurgeirsson á sínum stað í bakvarðarstöðunni hjá Willem II sem sigraði 2-0 á heimavelli gegn Go Ahead Eagles.
Rúnar Þór lék allan leikinn og er Willem komið með fjögur stig eftir tvær fyrstu umferðirnar á nýju tímabili.
Viðar Ari Jónsson kom þá inn af bekknum í dýrmætum sigri HamKam í efstu deild norska boltans, þar sem liðið er sex stigum fyrir ofan fallsvæðið með 24 stig úr 19 umferðum. Viðar og félagar voru lengi vel í fallsæti en eru búnir að sigra þrjá af fimm síðustu deildarleikjum sínum.
Júlíus Magnússon bar fyrirliðaband Fredrikstad í stóru tapi á heimavelli gegn Brann. Fredrikstad er í harðri baráttu um Evrópusæti og er í fimmta sæti norsku deildarinnar, fimm stigum á eftir Brann sem situr í öðru sæti.
Anton Logi Lúðvíksson kom inn af bekknum og fékk að spila hálftíma áður en honum var skipt aftur útaf í 2-2 jafntefli Haugesund gegn Sarpsborg. Haugesund er í fallsæti, með 18 stig eftir 19 umferðir.
Jón Dagur Þorsteinsson kom þá inn af bekknum snemma í síðari hálfleik í 1-1 jafntefli OH Leuven gegn Cercle Brugge í efstu deild belgíska boltans, á meðan Alfreð Finnbogason var ónotaður varamaður í góðum sigri Eupen í næstefstu deild.
Leuven er taplaust eftir fjórar umferðir og er komið með sex stig eftir þetta jafntefli, en Eupen var að spila í fyrstu umferð.
Í þýska bikarnum var Ísak Bergmann Jóhannesson í byrjunarliði Fortuna Düsseldorf sem tapaði 2-0 gegn Dynamo Dresden og var þannig slegið úr leik.
Að lokum kom hinn efnilegi Nóel Atli Arnórsson við sögu er AaB steinlá á heimavelli gegn Bröndby í efstu deild danska boltans. Álaborg er þar með sex stig eftir fimm umferðir.
Willem II 2 - 0 G.A. Eagles
HamKam 1 - 0 Odd
Fredrikstad 0 - 4 Brann
Sarpsborg 2 - 2 Haugesund
Leuven 1 - 1 Cercle Brugge
RFC Liege 0 - 3 Eupen
Dynamo Dresden 2 - 0 Fortuna Dusseldorf
AaB 0 - 4 Brondby
Athugasemdir
