Davíð Kristján Ólafsson lagði upp mark er Álasund gerði 3-3 jafntefli við Ranheim í norsku B-deildinni í kvöld og þá vann Emil Hallfreðsson fyrsta leik sinn með ítalska C-deildarliðinu Virtus Verona.
Davíð hefur verið frábær með Álasundi á þessari leiktíð og hélt góðu formi sínu gangandi með því að leggja upp annað mark liðsins í 3-3 jafntefli gegn Ranheim.
Hann er nú kominn með sex stoðsendingar í B-deildinni á þessu tímabili og er Álasund í 2. sæti með 47 stig þegar sex umferðir eru eftir.
Tvö efstu liðin fara beint upp í efstu deild en liðin í 3. - 6. sæti fara í umspil.
Álasund mætir Sandnes Ulf á heimavelli á sunnudag.
Fyrsti sigur Emils
Emil Hallfreðsson gekk til liðs við ítalska C-deildarliðið Virtus Verona á frjálsri sölu frá Padova. Hann kom inn í byrjunarliðið í síðasta leik í 1-1 jafntefli gegn Giana Erminio og í dag hafðist fyrsti sigurinn gegn Seregno, 3-1.
Emil byrjaði þann leik en var skipt af velli á 61. mínútu. Virtus Verona er í 14. sæti í A-riðli deildarinnar með 9 stig, jafnmörg og Seregno sem er í 13. sæti.
Næsti leikur Virtus er gegn Fiorenzuola á sunnudag.
Athugasemdir