Sheffield United og Manchester United eigast við í ensku úrvalsdeildinni á sunnudag. Það eru mikilvæg stig í boði en Sheffield er í fimmta sæti, stigi á undan Manchester liðinu.

Dean Henderson, aðalmarkvörður Sheffield United, er lánsmaður frá Manchester United og má ekki spila leikinn á sunnudag.

Varamarkvörðurinn Simon Moore, sem er 29 ára, mun spila í marki Sheffield en hann hefur ekki spilað deildarleik síðan í maí 2018.

„Simon hefur verið magnaður síðan hann kom til félagsins. Hann var frábær með okkur í C-deildinni. Hann hefur sýnt þolinmæði en er fullur tilhlökkunar fyrir sunnudeginum," segir Chris Wilder, hinn geðþekki stjóri Sheffield.

John Egan meiddist í landsleik með Írum gegn Dönum á mánudag en Wilder segir mögulegt að hann geti spilað á sunnudag.

„Það verður tekin ákvörðun á síðustu stundu. Við eigum menn til að fylla hans skarð. Ef John er ekki klár spilar Phil Jagielka og hann býr yfir gríðarlegri reynslu af stórleikjum," segir Wilder.

Tweet

Senda a Facebook Hafdu samband Senda frétt Prenta frétt Frétta leit