Tindastóll tapaði illa gegn Þór/KA í kvöld í Boganum. Fótbolti.net ræddi við Halldór Jón Sigurðsson, Donna, þjálfara Tindastóls eftir leikinn.
Lestu um leikinn: Þór/KA 5 - 0 Tindastóll
„Er súr og svekktur með þessi mörk sem við fáum á okkur úr föstum leikatriðum. Svekktur með sóknarleikinn heilt yfir, fannst við geta verið betri á boltanum. Við vorum að spila á móti liði sem er komið lengra en við, við vonuðumst til að geta gert aðeins betur en það gekk ekki," sagði Donni.
Gestirnir voru ekki ánægðir með annað mark Þór/KA og töldu að það hafi átt að dæma það af vegna rangstöðu. Konráð Freyr Sigurðsson aðstoðarþjálfari Tindastóls og bróðir Donna fékk að líta rauða spjaldið fyrir mótmæli.
„Konni bróðir fór aðeins fram úr sér í gleðinni. Hann fór út úr boðvangnum sem var ekki merktur sem er annað mál. Dómarinn gaf honum gult fyrir það og leið svo illa yfir látbragðinu hjá bróður mínum eftir það og gaf honum annað gult," sagði Donni.
„Mér fannst dómarinn geta andað með nefinu og haldið áfram með leikinn. Hann veit alveg af hverju við vorum pirraðir. Þetta er þessi nýja lína sem allir eru svo spenntir fyrir."
