Það fara tveir leikir fram í efstu deild Þjóðadeildarinnar í kvöld þar sem Spánn og Portúgal eru að berjast um efsta sætið.
Aðeins eitt stig skilur þessar nágrannaþjóðir að á toppinum þegar tvær umferðir eru eftir af deildarkeppninni. Spánn tekur á móti Sviss í kvöld á meðan Portúgal heimsækir Tékkland en liðin eigast svo við í innbyrðisslag í lokaumferðinni.
Spánn og Portúgal eiga tvö af sterkustu fótboltalandsliðum heims og verður áhugavert að fylgjast með þeim í kvöld.
Cristiano Ronaldo er í fremstu víglínu hjá Portúgal ásamt Rafael Leao, besta leikmanni Serie A, og Bernardo Silva. Bruno Fernandes og Ruben Neves eru á miðjunni ásamt William Carvalho, leikmanni Real Betis. Þá er Diogo Dalot í hægri bakverði og Ruben Dias í miðverði.
Ekkert pláss er í byrjunarliðinu fyrir leikmenn á borð við Diogo Jota, Joao Palhinha, Matheus Nunes og fleiri úrvalsdeildarleikmenn sem byrja á bekknum ásamt Nuno Mendes.
Marco Asensio leiðir sóknarlínu Spánverja með Ferran Torres og Pablo Sarabia sér til aðstoðar á vængjunum. Hinir ungu Gavi og Pedri eru á miðjunni við hlið Sergio Busquets og er miðjan því algjörlega í eigu Barcelona.
Varamannabekkur Spánverja inniheldur menn á borð við Koke, Rodri og Carlos Soler en lítið er um sóknarmenn. Alvaro Morata og Borja Iglesias eru á bekknum.
Í byrjunarliði Tékka má finna menn á borð við Patrick Schick og Hamrana tvo Tomas Soucek og Vladimir Coufal. Í liði Sviss eru Xherdan Shaqiri, Manuel Akanji og Granit Xhaka með Denis Zakaria og Fabian Schär á bekknum.
Tékkland: Vaclik, Zima, Brabec, Jemelka, Coufal, Soucek, Kral, Zeleny, Barak, Hlozek, Schick
Portúgal: Costa, Dalot, Dias, D.Pereira, Rui, W.Carvalho, Fernandes, Neves, B.Silva, Leao, Ronaldo
Spánn: Simon, Azpilicueta, Garcia, P.Torres, Alba, Gavi, Busquets, Pedri, F.Torres, Asensio, Sarabia
Sviss: Sommer, Widmer, Akanji, Elvedi, Rodriguez, Freuler, Xhaka, Sow, Shaqiri, Vargas, Embolo
