Ísland vann öruggan og langþráðan 0-2 sigur á Norður-Írlandi í kvöld
Aðspurður um leikinn svaraði Þorsteinn Halldórsson, þjálfari íslenska kvennalandsliðsins,
„Mér fannst þetta bara vera sannfærandi, mér fannst fyrri hálfleikurinn mjög góður og heilt yfir bara fínn. Svo kannski í seinni hálfleik þá drápum við tempóið aðeins of mikið niður og héldum ekki alveg sama takti í leik okkar, kannski of róleg í því sem við ætluðum að gera og hefðum getað gert þetta betur."
„Ég er bara sáttur með að koma hingað og vinna. Þetta er fyrri leikurinn og við þurfum að mæta í seinni leikinn og klára hann líka"
Lestu um leikinn: Norður-Írland 0 - 2 Ísland
Amir Mehica kom nýr inn í landsliðsteymið núna í haust og sér um föst leikatriði hjá liðinu, gott dagsverk hjá honum þar sem bæði mörk Íslands komu úr föstum leikatriðum í kvöld.
„Jú hann var búinn að lofa marki þannig það er bara gott"
„Gott að við höldum áfram að skora úr föstum leikatriðum, við höfum gert það hingað til og reglulega og ég er bara mjög sáttur að við höldum því áfram."
„Þær ógnuðu í sjálfu sér ekkert markinu okkar en við þurfum bara að halda haus og mæta að krafti inn í seinni leikinn og klára hann og spila hann vel líka."
„Ég held að þær muni áfram liggja til baka og beita skyndisóknum og svona bíða eftir tækifærunum sínum. Maður hefði kannski haldið að á heimavelli að þær gerðu meira af því að pressa en þær gerðu ekkert af því raunverulega, þannig eitthvað þurfa þær að reyna allavega til að skora en við þurfum bara að mæta og spila okkar leik, mæta af krafti og ekki gefa nein færi á okkur."
Viðtalið í heild má sjá í spilaranum hér að ofan
